Goodbye 2009

啱啱又睇返上年同前年同一日自己寫乜.....寫blog有個好處就係可以睇返當年今日嘅心情.....

原來年年我啲心情都係差唔多，年年都覺得過得好快......今年比往年更快........

可能因為淨係搞搬屋嘅嘢已經忙咗幾個月...總結一下先：

事業：雖然冇乜特別，但overall算係開心嘅，因為升職加薪，加薪幅度仲突破咗我工作13年嚟嘅宿命！而呢份工亦係我近年做得最長嘅一份。

感情：唔開心！希望2010年會有著落！

家庭：唔開心！有人唔生性！等緊佢開竅！

健康：平穩...雖然有時會舊病復發.....但仍然希望未來會好啲！

生活：好x辛苦...2009年仲要冇去過旅行(出團唔計)，好似成年冇食飯咁....所以好期待下星期嘅華東之旅！

祝大家新年快樂！

Carol & Pang's Wedding Banquet

尋日Carol 結婚，晏晝我哋就已經出去尖沙咀觀禮，第一次去伊甸園，我發現冇想像中咁好，因為個場實在太細，比婚姻註冊處細好多，基本上多幾個人已經裝唔落，所以好多人都寧願企出門口，事實上個場又冇乜特別，所以感覺一般。

一早出去，仲要等夜晚嗰餐飲，中間都唔知做乜好，Mandy就話不如去睇戲，果然係good idea，況且呢期上啲戲都幾唔錯，不過落到旺角，UA同百老匯都爆晒，又竟然俾Mandy諗到仲有間新寶，真係有好多位喎.....結果我哋揀咗睇十月圍城。

呢套戲係講孫中山為策劃起義，所以要嚟香港一個鐘同黨友開會，由於孫中山係滿清政府大患，所以一直要佈署暗殺佢，但就係為咗呢一個鐘，要動用成棚人去保護佢，當然結果係九死一生，仲要個個都死法殘忍。

睇完呢套戲我真係認為呢種革命一啲都唔值得，犧牲者當然認為自己死得有價值。歷史我唔識，但我個人認為就算唔起義，滿清政府滅亡都係遲早嘅事，只係爭在點死法啫，究竟係俾其他部族取代定還是再割地被外國統治，或者未必要死咁多手無搏雞之力嘅人。

我嘅角度係，民主只係一個方法，唔係唯一方法，亦唔係最好方法。重點係一個國家有好嘅領導者，至於呢個好嘅領導者係咪一定係民選呢？君不見美國喬治布殊同台灣陳水扁都係在任8年，同樣係民選，真係可以因為做得唔好而被人民推翻？民主？........假象嚟啫。恕我孤陋寡聞，我只係buy有能者居之，至於點選出嚟真係唔關我事。作為黎民百姓，我只係需要公平、自由同人權。民生做得好，真係咁需要民主咩？

套戲幾好睇，不過睇完其實個心真係有啲唔舒服。

睇完戲，又返去紅磡煌府度飲，結果全日到送客先有用自己部相機影相：

外賣

尋日又見客...雖然近排好忙，不過公司多生意都係好事嚟嘅！

之後個客上嚟公司，原本只係參觀下行兩個圈就走，點知尋日lunch啲餐廳竟然full得好緊要，book唔到檯 (之前個sales仲懶老定)，結果選擇去樓下間酒樓叫外賣......本來仲諗住佢哋走晒我就有餐安落茶飯食下，點知美夢成空。我仲要成為一個侍應，幫佢哋落order、落樓下拎埋上嚟、鋪埋檯仲要等佢哋食完執埋檯......出團我已經覺得自己好似侍應，估唔到連做正職都走唔甩！

所以連我都揀叫外賣 (冇理由自己走出去買嘛)....我就揀咗食日式嘢，好開心，係刺身+烏冬......幾好食呀！盛惠55大元！

個樣ok，食落都ok！

Pre-Christmas Party

星期日同Michelle, Joyce, Rayanne & 婷婷搞咗個Pre-Christmas Party，雖然婷婷冇一齊食飯...不過有佢就乜都夠晒開心！

未夠鐘食飯，我哋就先喺海港城間Hip Katsu飲嘢，結果冇飲到，大家都係食新地：

佢貨不對辦嘅地步簡直係出神入化！

大家認住...就係呢間嘢！

呢個和式新地就係婷婷叫嘅，經我哋同waitress講之後，佢就加咗少少啫喱，大杯咗，不過個樣都係咁上下......唔知有冇加料呢？

至於我哋嗰幾杯就好少少咁啦.....

唔記得邊個提議用塊鏡嚟影晒我哋4個o架呢？真聰明

晚餐婷婷約咗舊同學食飯join唔到我哋....嘥晒！晚飯地點係Joyce推介，位於尖沙咀嘅Delaney's Kowloon.......

Michelle book檯時staff問佢係咪Christmas dinner，佢問價錢有乜分別，staff話冇分別......wahaha...原來係有個咁靚嘅佈置呀！

個餐牌幾有氣氛呀...不過呢個餐牌檯檯都有....

偷咗Joyce杯Baileys飲咗一啖，原來真係幾好飲

Main course大家都叫火雞...影得衰....半張相都係汁.....哈哈哈

Rayanne夜晚先嚟join我哋.....後面棵聖誕樹幾靚.....^^

食完飯我哋去1881度影相，從來都未嚟過呀(好似新開嘅)，名店林立....不過啲建築好有特色！

Hip Katsu http://www.openrice.com/restaurant/sr2.htm?shopid=37738

Delaney's Kowloon http://www.openrice.com/restaurant/sr2.htm?shopid=585

599，玩到嘔！

記得97金融海嘯後因為冇人去旅行，Bangkok同台灣團都推出過$999嘅團，結果被稱之為「999，玩到嘔」。今時唔同往日，999已經唔係低價......我竟然join到一個599嘅團。

地點當然唔係Bangkok亦唔係台灣，而係上海、杭州、蘇州、無錫......仲要係6天飛機團............真係講都唔信，之前聽過699已經覺得好誇張，而家竟然再平100蚊，真係嚇親！香港上機不特止，仲要連餐都差唔多全包(只係可能因為航班問題有一餐半餐要自費)，咁當然自費項目同shopping就梗唔少得，呢啲就預咗嘅。出呢個團嘅係信成假期，呢間旅行社碌卡竟然唔收手續費(雖然只限第一次碌...但已經好好)，團費已經好平喇喎....仲可以碌卡？都唔知呢間公司賺乜...會唔會唔買嘢冇酒店住呢？哈哈哈.........

1月去唔成婷婷嘅倫敦之旅，咁就決定用呢啲budget請阿爸阿媽去旅行......究竟平嘢有冇好？去完返嚟再研究......

不過淨係食住同機票都抵返晒啦.....所以唔會對個團有太大期望......

Reference: http://www.sigholiday.com/2_cwe.htm 信成假期